ఇలా ఓ సినిమా ప్రకటించిన వెంటనే అలా గాసిప్స్ పుట్టుకురావడం సర్వ సాధారణం. రామ్ గోపాల్ వర్మ విషయంలో కూడా ఇలానే జరిగింది. తను పూర్తిగా మారిపోయానని, తను తీసిన ‘సత్య’ సినిమా చూసిన తర్వాత జ్ఞానోదయం అయిందంటూ చాలా చెప్పుకొచ్చాడు వర్మ.
అలా ప్రకటించిన మరుసటి రోజే కొత్త సినిమా ప్రకటించాడు. దానికి ‘సిండికేట్’ అనే టైటిల్ కూడా పెట్టాడు. చూచాయగా స్టోరీలైన్ కూడా వెల్లడించాడు. ‘జంతువుల కంటే క్రూరమైన మనుషులు’ అనే ట్యాగ్ లైన్ కూడా ప్రకటించాడు.
ఇంత జరిగిన తర్వాత గాసిప్ రాయుళ్లు ఊరుకుంటారు. వాళ్లు తమదైన శైలిలో రెచ్చిపోయారు. ‘సిండికేట్’ లో వెంకటేశ్ నటిస్తున్నాడని.. కీలక పాత్రల్లో బిగ్ బి, ఫహాద్ ఫాజిల్, పృధ్వీరాజ్ సుకుమారన్ కనిపించబోతున్నారంటూ రాసుకొచ్చాడు.
అది కాస్తా వైరల్ అవ్వడంతో, వర్మ మరోసారి రంగంలోకి దిగాడు. ఓ సెక్షన్ మీడియాలో నడుస్తున్న ప్రచారంలో నిజం లేదని, అదంతా ఫేక్ అని ప్రకటించాడు. త్వరలోనే నటీనటుల వివరాలను తానే ప్రకటిస్తానని చెప్పుకొచ్చాడు. అదీ సంగతి.
