మొన్నటివరకు ఆమె మినిస్టర్. కాబట్టి పూర్తిగా వెండితెరకు, బుల్లితెరకు దూరమయ్యారు. ఇప్పుడామె మాజీ మంత్రి. కనీసం ఎమ్మెల్యే కూడా కాదు. సో.. ఆమెకిప్పుడు ఖాళీ సమయం దొరికింది. దీంతో మరోసారి రీఎంట్రీ ఇస్తున్నారు రోజా.
రోజా అంటే జబర్దస్త్… జబర్దస్త్ అంటే రోజా. అలా ఉండేది ఆ బంధం. నగరి నియోజకవర్గం నుంచి ఎమ్మెల్యేగా గెలిచిన తర్వాత కూడా ఆమె ఆ కార్యక్రమాన్ని వీడలేదు. ఎప్పుడైతే మంత్రిగా బాధ్యతలు స్వీకరించారో అప్పట్నుంచి అన్ని రకాల వినోద కార్యక్రమాలకు ఆమె దూరమయ్యారు.
గతేడాది జరిగిన సార్వత్రిక ఎన్నికల్లో ఓడిపోవడంతో మరోసారి బుల్లితెరపై కన్నేశారు రోజా. ఓ వైపు రాజకీయాల్ని కొనసాగిస్తూనే, మరోవైపు టీవీ షోల్లో కనిపించాలని నిర్ణయించుకున్నారు. ఇందులో భాగంగా జీ తెలుగులో ఓ కార్యక్రమంలో ఆమె కనిపించబోతున్నారు. దీనికి సంబంధించిన ప్రోమో కూడా వచ్చింది.
అయితే ఆమె తిరిగి జరర్దస్త్ సెట్స్ లోకి అడుగుపెడతారా లేదా అనేది చూడాలి. 2013 నుంచి 2022 వరకు జబర్దస్త్ జడ్జిగా కొనసాగారు రోజా. మళ్లీ ఇప్పుడామె అందులోకి కూడా రీఎంట్రీ ఇస్తారనే ప్రచారం నడుస్తోంది.
