దశాబ్దాల కెరీర్. లెక్కలేనన్ని బ్లాక్ బస్టర్లు. సౌత్ లో కోటి రూపాయల రెమ్యూనరేషన్ అందుకున్న తొలి హీరో. ఇప్పటికీ పారితోషికంలో టాప్-5లో కొనసాగుతున్నారు చిరంజీవి. ఇలాంటి హీరో నుంచి ఊహించని మాటలొచ్చాయి.
అవును.. తన సంపాదన అంతంతమాత్రం అన్నారు చిరంజీవి. ఆయన ఈ మాట అనడం వెనక చాలా పెద్ద లాజిక్ ఉంది. గతంలో హైదరాబాద్ లో ఇల్లు కట్టుకున్నప్పుడు విదేశాల నుంచి కొన్ని మొక్కలు తీసుకొచ్చి నాటారు చిరంజీవి.
అప్పట్లో వాటి ధరలు వేలల్లో ఉండేవని, ఆ తర్వాత లక్షల్లోకి మారాయని, ఇప్పుడు కొన్ని విదేశీ మొక్కలు కొనాలంటే కోటి రూపాయల వరకు పెట్టాల్సి వస్తోందని అన్నారు. ప్రస్తుతం తన సంపాదన అంతంతమాత్రంగానే ఉందని, అంత మొత్తం పెట్టి మొక్కలు కొనలేనంటూ జోక్ చేశారు చిరంజీవి.
తెలంగాణ ముఖ్యమంత్రి రేవంత్ రెడ్డితో కలిసి హైదరాబాద్ లో ఓ ఎకో టూరిజం పార్క్ ను ప్రారంభించారు చిరంజీవి. ఈ సందర్భంగా ఇలా ఆసక్తికర వ్యాఖ్యలు చేశారు. 150 ఎకరాల విస్తీర్ణంలో కొలువుదీరిన ఈ ఎకో టూరిజం పార్క్ లో తొలిసారి షూటింగ్ జరుపుకునే అవకాశం చిరంజీవికే ఇస్తామని, ఆ తర్వాతే ఇతర సినిమాలకు అవకాశం ఇస్తామని పార్క్ ఓనర్స్ ప్రకటించడం విశేషం.
