ముంబయిలో ఎంతో ఇష్టపడి డిజైన్ చేయించుకున్న ఇంటిని నటి కమ్ ఎంపీ కంగనా రనౌత్ అమ్మకానికి పెట్టిన సంగతి తెలిసిందే. ఓ రియల్ ఎస్టేట్ సంస్థ, తమ లిస్టింగ్ లో ఈ ప్రాపర్టీని కొన్ని రోజుల కిందట సేల్ కు పెట్టింది. ఇప్పుడీ ప్రాపర్టీ అమ్మకం పూర్తయింది.
ముంబయిలోని పాలీ హిల్ బంగ్లాను ఆమె 32 కోట్ల రూపాయలకు విక్రయించింది. ఈ ప్రాపర్టీని ఆమె 2017లో 20 కోట్ల రూపాయలకు కొనుగోలు చేసింది. 3075 చదరపు అడుగుల విస్తీర్ణంలో ఆవరించి ఉన్న ఈ ఇంట్లో, 565 చదరపు అడుగుల అదనపు పార్కింగ్ ప్లేస్ కూడా ఉంది.
ఈ ప్రాపర్టీ అంటే కంగనాకు చాలా ఇష్టం. దాదాపు 2 కోట్ల రూపాయలు ఖర్చుపెట్టి, చాలా ఏళ్ల కిందటే ఆమె ఇంటీరియర్ చేయించుకుంది. అంతేకాదు, ముందు భాగాన్ని తన ప్రొడక్షన్ హౌజ్ ఆఫీస్ గా కూడా మార్చుకుంది.
అయితే ఎంపీగా మారిన తర్వాత ఆ ప్రాపర్టీపై ఆమె పెద్దగా ఆసక్తి చూపించడం లేదు. గతంలో ఇదే బంగ్లా కేంద్రంగా ముంబయి మహానగర పాలక సంస్థతో, కంగనా రనౌత్ కు గొడవ జరిగింది. కార్పొరేషన్ వాళ్లు సొంత భాగాన్ని కూలగొట్టారు కూడా. భవిష్యత్తులో అలాంటి వివాదాలు ఉండకుండా ప్రాపర్టీని ఆమె అమ్మేసింది.
