జానీ లివర్… పరిచయం అక్కర్లేని కమెడియన్. రెండు దశాబ్దాలు బాలీవుడ్ ని ఏలిన హాస్య నటుడు ఆయన. పేరు తెచ్చుకున్నది, స్టార్డమ్ సంపాదించుకున్నది బాలీవుడ్ లోనే కానీ ఆయన అచ్చ తెలుగువాడు.
ఇప్పటికీ బాలీవుడ్ చిత్రాల్లో నటిస్తున్నారు ఆయన. ఇక ఆయన కూతురు జెమి లివర్ స్టాండప్ కమెడియన్ గా పేరు తెచ్చుకున్నారు. స్టాండప్ షోలతో ప్రపంచమంతా తిరుగుతారు. స్టాండప్ షోలతో తండ్రికి తగ్గ తనయ అనిపించుకున్న జెమి లివర్ తెలుగులో కూడా అరంగేట్రం చేస్తున్నారు.
ఆమె నటించిన మొదటి తెలుగు చిత్రం… ‘ఆ ఒక్కటీ అడక్కు’.
కామెడీ కింగ్ అల్లరి నరేష్ హీరోగా నటించిన చిత్రం… ‘ఆ ఒక్కటీ అడక్కు’. ఈ సినిమా మే 3న విడుదల కానుంది. ఇందులో నరేష్ సరసన ఫరియా అబ్దుల్లా హీరోయిన్ గా నటించింది. ఐతే ఒక కీలకమైన పాత్రలో జెమిని తీసుకున్నారు మేకర్స్.
ఆమె తెలుగులో ధారాళంగా మాట్లాడలేదు కానీ బాగానే కమ్యూనికేట్ చేస్తున్నారు. ఈ సినిమా ప్రమోషన్స్ కూడా చేస్తున్నారు.
