వీరాభిమాని రేణుకాస్వామి హత్య కేసులో నిందితుడిగా ఉన్న కన్నడ ఛాలెంజింగ్ స్టార్ దర్శన్, ప్రస్తుతం రిమాండ్ ఖైదీగా ఉన్న సంగతి తెలిసిందే. మొన్నటివరకు అతడు బెంగళూరులోని పరప్పర అగ్రహార జైలులో ఉండేవాడు.
ఆ జైలులో అతడికి రాజభోగాలు దక్కాయి. దాదాపుగా హీరో ట్రీట్ మెంట్ ఎంజాయ్ చేశాడు. దీనికి సంబంధించి కొన్ని ఫొటోలు బయటకురావడంతో హుటాహుటిన దర్శన్ ను బళ్లారి సెంట్రల్ జైలుకు తరలించారు.
అయితే పరప్పర అగ్రహార జైలు నుంచి దర్శన్ వెళ్లిపోయినా, ఆ జైలుపై అధికారుల నిఘా మాత్రం తగ్గలేదు. తాజాగా ఆ జైలులో అధికారులు మెరుపు దాడులు నిర్వహించారు. దీంతో ఆ జైలు అసలు స్వరూపం బయటపడింది.
ఏకంగా జైలులో 15 ఫోన్లు దొరికాయి. వీటిలో లక్షా 30వేల రూపాయల ఖరీదైన శాంసంగ్ ఫోన్ కూడా ఉంది. 7 ఎలక్ట్రిక్ స్టవ్ లు, 10కి పైగా పెన్ డ్రైవ్ లు దొరికాయి. వీటితోపాటు 5 కత్తులు కూడా దొరికాయి. 36వేల రూపాయల డబ్బుతో పాటు.. లెక్కలేనన్ని సెగరెట్ ప్యాకెట్లు, బీడీ ప్యాకెట్లు, అగ్గిపెట్టెలు దొరికాయి. ఇవన్నీ చూసిన అధికారులు అవాక్కయ్యారు.
