చాలామంది ఇష్టంతో దర్శకులుగా మారతారు. కానీ దర్శకుడు బాబి మాత్రం కోపంతో దర్శకుడిగా మారానంటున్నాడు. ఇంతకీ అతడికి అంత కోపం ఎందుకు?
“రచయితగా లైఫ్ చాలా బాగుంటుంది. ఏసీలో కూర్చోవచ్చు, ఎండలోకి రానక్కర్లేదు. రైటర్ గా చేసినప్పుడు నేను బాగా ఎఁజాయ్ చేశాను. కాకపోతే నాకు ఒకటే కోపం. నన్ను ఎవ్వడూ గుర్తించట్లేదు. నాలుగు గోడల మధ్య విపరీతమైన గౌరవం వస్తోంది. కానీ ప్రెస్ ముందు దర్శకులు నా గురించి మాట్లాడ్డం లేదు. అది వాళ్ల తప్పు కూడా కాదు. ఆ కోపంతోనే నేను దర్శకుడిగా మారాను. ఆ కోపం నుంచే ‘పవర్’ అనే సినిమా చేశాను. నిజంగా నాకు రైటర్ గా మీడియా ముందు కూడా రెస్పక్ట్ ఇచ్చినట్టయితే, నేనసలు దర్శకుడిగా మారేవాడ్ని కాదు. నా భార్యకు కూడా పెద్ద కోరికల్లేవ్, హ్యాపీగా ఉండేవాళ్లం.”
ఇలా తన దర్శకుడిగా మారడం వెనక కథను బయటపెట్టాడు బాబి కొల్లి. బాలకృష్ణతో ‘డాకు మహారాజ్’ సినిమా తీసిన ఈ దర్శకుడు, ఆ సినిమా ప్రచారంలో భాగంగా మీడియాకు ఇంటర్వ్యూలిస్తున్నాడు. ఈ సందర్భంగా మరో ఆసక్తికర విషయాన్ని కూడా వెల్లడించాడు.
ఈ సినిమాలో బాబీ డియోల్ విలన్ గా నటించిన సంగతి తెలిసిందే. ‘యానిమల్’ సినిమా హిట్టయిన తర్వాత ఆ క్రేజ్ ను క్యాష్ చేసుకునేందుకు బాబీనీ ఈ ప్రాజెక్టులోకి తీసుకున్నారని అంతా అనుకుంటున్నారు. అయితే బాబీ మాత్రం, యానిమల్ సినిమా రిలీజ్ కంటే ముందే బాబీకి ఈ కథ వినిపించాడట. ‘యానిమల్’ రిలీజ్ తర్వాత కూడా బాబీ డియోల్ ఈ పాత్ర చేయడానికి అంగీకరించాడంటే, ఆ క్యారెక్టర్ లో ఉన్న లోతును అంతా అర్థం చేసుకోవాలంటున్నాడు బాబి.
