చిరంజీవి, రామ్ చరణ్ పై ఓ నాలుగేళ్ల కిందట దర్శకుడు విజయ్ కనకమేడల వేసిన ట్వీట్ మరోసారి వైరల్ అయిన సంగతి తెలిసిందే. దీనిపై మెగా ఫ్యాన్స్ భగ్గుమన్నారు. కనకమేడల కూడా దిగొచ్చాడు. క్షమాపణలు చెప్పాడు. అయితే ఇక్కడ మేటర్ అది కాదు.
అతడు క్షమాపణలు చెప్పడానికి సరిగ్గా 48 గంటల ముందు ఓ ప్రకటన చేశాడు. త్వరలోనే చిరంజీవితో ఓ సినిమా చేస్తాననేది అతడి ప్రకటన సారాంశం. చిరంజీవితో “ఠాగూర్” తరహా సినిమా తీస్తానని, వినోదంతో పాటు మంచి సందేశం, యాక్షన్ అందులో ఉంటాయని ఆయన ప్రకటించుకున్నాడు.
ప్రస్తుతం తన టీమ్ ఆ పనిలోనే ఉందని, త్వరలోనే చిరంజీవిని కలిసి కథ వినిపిస్తానని అన్నాడు. అతడు ఆ స్టేట్ మెంట్ ఇచ్చిన 2 రోజులకే, అతడి పాత ట్వీట్ వైరల్ అవ్వడం, మెగా ఫ్యాన్స్ భగ్గుమనడం చకచకా జరిగిపోయాయి.
ఇంత జరిగిన తర్వాత విజయ్ కనకమేడలకు చిరంజీవి అవకాశం ఇస్తారా.. రామ్ చరణ్ రానిస్తాడా.. ఇలా ఎన్నో సందేహాలు కలుగుతున్నాయి. మెగా ఫ్యాన్స్ మాత్రం విజయ్ కనకమేడలను కాంపౌండ్ లోకి అడుగుపెట్టనీయొద్దంటూ డిమాండ్ చేస్తున్నారు.
విజయ్ కనకమేడల “నాంది” అనే సినిమాతో దర్శకుడిగా పరిచయం అయ్యాడు. ఆ తర్వాత నరేష్ తో మరో సినిమా తీస్తే అట్టర్ ఫ్లాప్ అయింది. ఇప్పుడు “భైరవం” అనే సినిమా తీశాడు. ఈ సినిమా విడుదల సందర్భంగా ఇలా ఇరకాటంలో పడ్డాడు.
