హరిహర వీరమల్లు సినిమా సెట్స్ పైకి వచ్చింది. లాంగ్ గ్యాప్ తర్వాత పవన్ కల్యాణ్, సెట్స్ పైకి వచ్చాడు. ఈ సినిమా కోసం బెజవాడలో సెట్ వేశారు. పనిలోపనిగా రిలీజ్ డేట్ కూడా ప్రకటించారు. వచ్చే ఏడాది సమ్మర్ ఎట్రాక్షన్ గా మార్చి 28న హరిహర వీరమల్లు సినిమాను విడుదల చేయబోతున్నట్టు ప్రకటించారు.
ఓ పెద్ద సినిమా విడుదల చేస్తే, ఆ ప్రభావం ఇతర సినిమాలపై కచ్చితంగా పడుతుంది. పవన్ సినిమా రిలీజ్ డేట్ కూడా ఓ సినిమాపై పడింది. అదే విజయ్ దేవరకొండ నటించిన తాజా చిత్రం. గౌతమ్ తిన్ననూరి దర్శకత్వంలో విజయ్ దేవరకొండ ఓ సినిమా చేస్తున్నాడు. వచ్చే ఏడాది మార్చి 28న ఈ సినిమాను విడుదల చేస్తామని ఇదివరకే ప్రకటించారు.
కట్ చేస్తే, ఇప్పుడు అదే తేదీకి పవన్ సినిమాను షెడ్యూల్ చేశారు. సమ్మర్కి ఇంకా చాలా సినిమాలు వస్తున్నాయి. కాబట్టి విజయ్ దేవరకొండ సినిమాను వాయిదా వేయడం సాధ్యం కాదు. అలా అని ప్రీ-పోన్ చేయడం కూడా సాధ్యం కాదు. అలా చేస్తే వేసవి శెలవుల అడ్వాంటేజ్ కోల్పోతుంది విజయ్ సినిమా.
విజయ్ దేవరకొండ సినిమాకు ఇంకా టైటిల్ ఎనౌన్స్ చేయలేదు. త్వరలోనే టైటిల్ ఎనౌన్స్ చేస్తామని స్వయంగా విజయ్ దేవరకొండ ప్రకటించాడు. ప్రస్తుతం ఈ సినిమా షూటింగ్ కేరళలో జరుగుతోంది.
