‘పుష్ప-2’ థియేటర్లలోకి వచ్చింది. చివర్లో “పుష్ప 3” కి దారి కల్పిస్తూ సినిమాని ముగించారు. ఐతే, రెండో భాగంలోనే చాలా విషయాలు సరిగా చూపించలేదు. ఈ సినిమాతో సుకుమార్ చాలా ప్రశ్నల్ని అలానే ఓపెన్ గా వదిలేశాడు. మరి పార్ట్-3 తీయాలంటే ఆమాత్రం సస్పెన్స్ ఉండాలి కదా… బహుశా వాటిని అందులో చూపిస్తారేమో.
అయితే అసలైన సస్పెన్స్ ఇంకోటి ఉంది. పార్ట్-1లో జాలిరెడ్డిని తుక్కుతుక్కుగా కొడతాడు పుష్ప. తన ప్రేయసి శ్రీవల్లి జోలికి వచ్చినందుకు అతడికి ఆ శిక్ష విధిస్తాడు. తనకు జరిగిన పరాభవాన్ని గుర్తుంచుకుంటానని, ఎప్పటికైనా పగ తీర్చుకుంటానని అంటాడు జాలిరెడ్డి.
మరి ‘పుష్ప-2’లో ఆ ఎపిసోడ్ ఎక్కడ? అసలు జాలి రెడ్డి ఎక్కడ.. సీక్వెల్ లో జాలిరెడ్డి జాడ కనిపించలేదు. అతడి ఎపిసోడ్ ను పూర్తిగా పక్కనపెట్టాడు సుకుమార్. నిజానికి సీక్వెల్ వస్తుందనగానే జాలిరెడ్డి ఎపిసోడ్ కు ఓ కంక్లూజన్ వస్తుందని అంతా ఎదురుచూశారు. ఆ పాత్ర పోషించిన డాలీ ధనంజయ ప్రేక్షకులపై చెరగని ముద్ర వేశాడు. కానీ పార్ట్-2లో జాలి రెడ్డి ప్రస్తావనే లేదు. ఇలా చెప్పుకుంటూపోతే సశేషంగా వదిలేసిన అంశాలు ఎన్నో ఉన్నాయి.
ప్రారంభంలో చూపించిన జపాన్ ఎపిసోడ్.. క్లైమాక్స్ లో పేలిన బాంబ్, మధ్యలో మాయమైన షెకావత్.. ఇలా చాలా అంశాలపై స్పష్టత ఇవ్వకుండానే ‘పుష్ప-2’కు శుభం కార్డు వేశాడు దర్శకుడు.అన్నీ మూడో భాగంలోనే చూడాలేమో!
