నోరుజారిన గంటల వ్యవధిలోనే తప్పు తెలుసుకున్నాడు దర్శకుడు త్రినాధరావు నక్కిన. నిండు సభలో తను మాట్లాడిన మాటలు తప్పని అంగీకరించాడు. భేషరతుగా క్షమాపణలు చెప్పాడు.
ఇంతకీ ఏం జరిగిందంటే..
“మజాకా” టీజర్ లాంఛ్ ఫంక్షన్ జరిగింది. దాదాపు 2 దశాబ్దాల గ్యాప్ తర్వాత అన్షు (‘మన్మధుడు’లో రెండో హీరోయిన్) ఈ సినిమాతో రీఎంట్రీ ఇస్తోంది. ఆమె గురించి మాట్లాడే క్రమంలో కాస్త అసభ్యంగా కామెంట్ చేశాడు దర్శకుడు.
అన్షు చాలా సన్నగా ఉందని, బాగా తిని సైజులు పెంచమని చెప్పానని ఓపెన్ గా అనేశాడు. అక్కడితో ఆగకుండా, ఎక్కువ సైజులతో ఇప్పుడామె ఇంప్రూవ్ అయిందని, రాబోయే రోజుల్లో మరింత ఇంప్రూవ్ అవుతుందని అన్నాడు.
దీనిపై సోషల్ మీడియాలో నక్కినపై తెగ ట్రోలింగ్ నడిచింది. చివరికి తెలంగాణ మహిళా కమిషన్ కూడా ఈ వ్యవహారాన్ని సుమోటోగా స్వీకరించింది. రేపోమాపో త్రినాధరావుకు నోటీసులు ఇవ్వబోతోంది.
జరిగిన డ్యామేజీ ఏంటో నక్కినకు బోధపడింది. వెంటనే వీడియో రిలీజ్ చేశాడు. హీరోయిన్ అన్షుతో పాటు మహిళా లోకానికి భేషరతుగా క్షమాపణలు చెప్పాడు. అయితే విషయం ఇక్కడితో ఆగేలా లేదు.
