‘క’ సినిమాలో కృష్ణగిరి అనే ఊరును చూపించారు. ఏదో పేరు పెట్టాలి కాబట్టి పెట్టినట్టు కాకుండా, ఆ ఊరికి ఓ ప్రత్యేకతను కూడా ఆపాదించారు. ఆ ఊరికి చుట్టూ కొండలు ఉండడం వల్ల మధ్యాహ్నం 3 గంటలకే చీకటి పడిపోతుంది. మరుసటి రోజు తెల్లారేవరకు అంతా చీకటే.
ఇలా ‘క’ సినిమాలో ప్రత్యేకమైన ఊరును పరిచయం చేసింది యూనిట్. అయితే ఆ ప్రత్యేకతను ఆపాదించడం వెనక కారణం ఏంటనేది మాత్రం సినిమాలో వెల్లడించలేదు. దీనిపై కిరణ్ అబ్బవరం స్పందించాడు.
‘క’ సినిమాకు సీక్వెల్ ప్రకటించిన ఈ హీరో.. రెండో భాగంలో కృష్ణగిరి ఊరు వెనక స్టోరీని వెల్లడిస్తామని స్పష్టం చేశాడు. దర్శకులిద్దరూ ఆ ఊరు బ్యాక్ డ్రాప్ కు సంబంధించి మంచి లైన్ అనుకున్నారట. సీక్వెల్ ఆ లైన్ తో ప్రారంభమవ్వడంతో పాటు.. మరింత ఆసక్తికరంగా సాగుతుందని చెబుతున్నాడు.
దీపావళి బరిలో మరో 2 సినిమాలకు పోటీగా రిలీజైన ‘క’ మూవీ మంచి వసూళ్లు సాధిస్తోంది. టికెట్ రేట్లు తక్కువగా ఉండడం, పాజిటివ్ టాక్ రావడం సినిమాకు కలిసొచ్చింది.
