దాదాపు రెండేళ్లుగా నడుస్తున్న రీ-రిలీజ్ కల్చర్ ఈ సీజన్ లో మరింత ఊపందుకున్నట్టు కనిపిస్తోంది. బ్లాక్ బస్టర్ మూవీస్, క్లాసిక్స్ అన్నీ ఒకేసారి క్యూ కడుతున్నాయి. మహేష్ బాబు మురారి, నాగార్జున మైల్ స్టోన్ మూవీ శివ ఇప్పటికే రీ-రిలీజ్ డేట్స్ ఫిక్స్ చేసుకున్నాయి. ఇప్పుడీ లిస్ట్ లోకి చిరంజీవి నటించిన ఇంద్ర సినిమా కూడా చేరింది.
చిరంజీవి కెరీర్ లోనే బిగ్గెస్ట్ హిట్స్ లో ఒకటిగా నిలిచింది ఇంద్ర సినిమా. ఇప్పుడీ సినిమాను రీ-రిలీజ్ చేయబోతున్నారు. చిరంజీవి పుట్టినరోజు సందర్భంగా, ఇంద్ర సినిమాను మళ్లీ థియేటర్లలోకి తీసుకురాబోతున్నట్టు వైజయంతీ మూవీస్ సంస్థ ప్రకటించింది.
మెగా ఫ్యాన్స్ కు “ఇంద్ర” సినిమా ఓ ఎమోషన్. దానికి ఓ చిన్న కారణం ఉంది. అప్పటికే ఫ్యాక్షన్ సినిమాలతో బాలయ్య మంచి స్వింగ్ మీదున్నారు. ఫ్యాక్షన్ సినిమాలు చేయాలంటే బాలయ్య మాత్రమే అంటూ ప్రచారం చేసుకునేవాళ్లు నందమూరి అభిమానులు.
అలాంటి టైమ్ లో వచ్చిన “ఇంద్ర” సినిమా మెగాభిమానుల్లో ఉత్సాహం నింపింది. ఫ్యాక్షన్ అయినా, యాక్షన్ అయినా చిరంజీవి తర్వాతే ఎవరైనా అంటూ ఫ్యాన్స్ పండగ చేసుకున్నారు.
అటు చిరంజీవి కూడా “ఇంద్ర” హిట్ తో ఉబ్బితబ్బిబ్బయ్యారు. 22 ఏళ్ల కిందట తెలుగులోనే కాదు, టోటల్ సౌత్ లోనే బిగ్గెస్ట్ హిట్ గా నిలిచింది ఇంద్ర. అది మామూలు కిక్ కాదు. అందుకే ఆ సినిమా విజయోత్సవ సభలో చిరంజీవి స్వయంగా వీణ స్టెప్ వేసి తన ఫ్యాన్స్ ను ఆనందపరిచారు.
