ఒక్కోసారి సినిమా వాయిదాల మీద వాయిదాలు పడడం కూడా మంచిదేనేమో. “గ్యాంగ్స్ ఆఫ్ గోదావరి” సినిమాకు అది కాస్త కలిసొచ్చినట్టుంది. వాయిదాల వల్ల సినిమాపై ఆడియన్స్ లో ఆసక్తి పెరిగినట్టుంది. దీనికి తోడు మార్కెట్లో సరైన సినిమా లేకపోవడం కూడా కలిసొచ్చింది. అలా విశ్వక్ సేన్ తన కెరీర్ లోనే బిగ్గెస్ట్ ఓపెనింగ్స్ అందుకున్నాడు.
విశ్వక్ సేన్, నేహా శెట్టి హీరోహీరోయిన్లుగా నటించిన “గ్యాంగ్స్ ఆఫ్ గోదావరి” సినిమాకు మొదటి రోజు ప్రపంచవ్యాప్తంగా 8.2 కోట్ల రూపాయల గ్రాస్ వచ్చినట్టు నిర్మాతలు ప్రకటించారు. విశ్వక్ కెరీర్ లోనే ఇది బెస్ట్ ఓపెనింగ్ అంటున్నారు.
నైజాంలో ఈ సినిమాకు మొదటి రోజు కోటి రూపాయల వసూళ్లు వచ్చాయి. వైజాగ్, సీడెడ్ లో చెప్పుకోదగ్గ స్థాయిలో వసూళ్లు వచ్చాయి. మొదటి రోజు ఈ సినిమాకు చాలా సెంటర్లలో, దాదాపు అన్ని షోలు మంచి ఆక్యుపెన్సీ కనిపించింది.
అయితే ఈ సినిమా బ్రేక్ ఈవెన్ అవ్వాలంటే మాత్రం కొంచెం గట్టిగానే ఆడాల్సి ఉంది. ఎందుకంటే, రీషూట్స్, వాయిదాల వల్ల అనుకున్న బడ్జెట్ కంటే చాలా ఎక్కువ ఖర్చయింది. కృష్ణచైతన్య డైరక్ట్ చేసిన ఈ సినిమాకు యువన్ శంకర్ రాజా సంగీతం అందించగా, అంజలి కీలక పాత్ర పోషించింది.
