ధనుష్ కేవలం నటుడు మాత్రమే కాదు. అతడు మంచి దర్శకుడు కూడా. మినిమం గ్యాప్స్ లో సినిమాలకు డైరక్షన్ చేస్తుంటాడు. తాజాగా కూడా ఓ సినిమాను డైరక్ట్ చేశాడు. ఇప్పుడీ నటుడు కమ్ డైరక్టర్, పవన్ కల్యాణ్ పై ఫోకస్ పెట్టాడు.
పవన్ కల్యాణ్ ను తన డ్రీమ్ హీరోగా చెప్పుకొచ్చాడు ధనుష్. ఛాన్స్ వస్తే తెలుగులో పవన్ కల్యాణ్ ను డైరక్ట్ చేయాలనుకుంటున్నట్టు వెల్లడించాడు.
ధనుష్ చెప్పిన ఈ సమాధానంతో ‘కుబేర’ ప్రీ-రిలీజ్ ఫంక్షన్ హాల్ మొత్తం దద్దరిల్లిపోయింది. ఈ సందర్భంగా మరికొన్ని అంశాలపై కూడా స్పందించాడు ధనుష్.
అందరికీ ఉన్నట్టే, ఒకటో తారీఖు కష్టాలు తనకు కూడా ఉన్నాయన్నాడు. 150 రూపాయలు సంపాదిస్తే, 200 రూపాయలు కష్టాలుంటాయని, కోటి రూపాయలు సంపాదిస్తే, 2 కోట్ల రూపాయల సమస్యలుంటాయని అన్నాడు.
డబ్బు లేకపోయినా అమ్మ ప్రేమ దక్కుతుందంటున్న ధనుష్… ‘కుబేర’ సినిమాలో తను 3 డిఫరెంట్ షేడ్స్ ఉన్న పాత్రలు పోషించానని వెల్లడించాడు. శేఖర్ కమ్ముల దర్శకత్వంలో తెరకెక్కింది ఈ సినిమా.
