ఆగస్టు 15న అల్లు అర్జున్ నటిస్తోన్న “పుష్ప 2” విడుదల కానుంది. వినాయక చవితికి విజయ్ నటిస్తోన్న “G.O.A .T” రానుంది. దసరా పండగకి ఎన్టీఆర్ బిగ్ మూవీ “దేవర” ఫిక్స్ అయింది. దీపావళికి రామ్ చరణ్ సినిమా కానీ, రజినీకాంత్ మూవీ కానీ రావొచ్చు. ఇక ఈ ఏడాది మిగిలిన పెద్ద పండుగ క్రిస్మస్.
అందుకే, ఎనిమిది నెలల ముందే క్రిస్మస్ పండగకి కర్చీఫ్ వేస్తున్నారు ఇద్దరు హీరోలు. హీరో నితిన్ ఇప్పటికే తన తాజా చిత్రం “రాబిన్ హుడ్” డిసెంబర్ 20న విడుదల అవుతుంది అని ప్రకటించాడు. అంటే క్రిస్మస్ పండగకి ఐదు రోజుల ముందు. వీకెండ్ తో పాటు డిసెంబర్ 25న సెలవు కూడా కలిసి వస్తుంది అని ఆ డేట్ ని ఫిక్స్ చేశారు. ఈ సినిమాని “భీష్మ” దర్శకుడు వెంకీ కుడుముల తీస్తున్నారు. ప్రస్తుతం షూటింగ్ జరుగుతోంది. కానీ ఇంతముందే విడుదల తేదీని ప్రకటించారు.
ముందే ప్రకటించడం వల్ల మిగతా సినిమాలు ఏవీ తన సినిమాతో పోటీ పడవని నితిన్ భావించి ఉంటారు. కానీ అలా జరగబోవడం లేదు. పండుగని క్యాష్ చేసుకోవాలని నాగ చైతన్య కూడా ఆరాటపడుతున్నాడు.
నాగ చైతన్య, సాయి పల్లవి జంటగా దర్శకుడు చందూ మొండేటి తీస్తున్న “తండేల్” షూటింగ్ ప్రస్తుతం హైదరాబాద్ లో జరుగుతోంది. ఈ సినిమాని కూడా డిసెంబర్ 20న విడుదల చెయ్యాలని టీం భావిస్తోంది. క్రిస్మస్ కి వస్తామని తాజాగా ఆ టీం మీడియాకి సమాచారం ఇచ్చింది.
మరికొద్ది రోజుల్లో డేట్ తో కూడిన పోస్టర్ విడుదల చెయ్యనున్నారు. సో, ఈ సారి క్రిస్మస్ కి నాగ చైతన్య వర్సెస్ నితిన్ పోటీ ఉంటుంది. అన్నట్లు ఈ ఇద్దరు హీరోలకు హిట్ అవసరం. వారి గత చిత్రాలు దారుణ పరాజయం పాలు అయ్యాయి.
