మే నెల గడిచిపోయింది. జూన్ లో మరికొన్నిక్రేజీ మూవీస్ వస్తున్నాయి. వీటిలో ముందుగా వస్తున్న సినిమా ‘థగ్ లైఫ్’. దాదాపు 36 ఏళ్ల సుదీర్ఘ విరామం తర్వాత కమల్ హాసన్, మణిరత్నం కాంబినేషన్ లో వస్తోంది ‘థగ్ లైఫ్’. అందుకే ఈ సినిమాపై అంత క్రేజ్. శింబు, త్రిష లాంటి వాళ్లు అదనపు ఆకర్షణలు.
ఇక రెండో వారంలో ‘హరిహర వీరమల్లు’ వస్తోంది. ఇది కూడా మోస్ట్ ఎవెయిటింగ్ మూవీ. ఎందుకంటే, పవన్ కల్యాణ్ సినిమాలు ఆపేసి చాన్నాళ్లయింది. లాంగ్ గ్యాప్ తర్వాత ఆయన ఈ సినిమాతో వెండితెరపైకొస్తున్నారు. అందుకే అభిమానులు ఆశగా ఎదురుచూస్తున్నారు.
క్రిష్, జ్యోతికృష్ణ దర్శకత్వంలో తెరకెక్కిన ‘హరిహర వీరమల్లు’ సినిమాలో నిధి అగర్వాల్ హీరోయిన్ గా నటించింది. కీరవాణి ఈ సినిమాకు సంగీతం అందించారు. 12న సినిమా థియేటర్లలోకి వస్తోంది.
మూడో వారంలో ‘కుబేర’ వస్తోంది. దీనికి కూడా ఓ ప్రత్యేకత ఉంది. లాంగ్ గ్యాప్ తర్వాత శేఖర్ కమ్ముల నుంచి వస్తున్న సినిమా ఇది. పైగా ధనుష్, నాగార్జున, రష్మిక లాంటి తారాగాణం ఉన్న సినిమా. ఈ మూవీపై భారీ అంచనాలున్నాయి. ఈ సినిమాతో పాటు అదే రోజు, అంటే 20వ తేదీన ‘8 వసంతాలు’ అనే మరో సినిమా కూడా వస్తోంది.
ఇక జూన్ నెలకు ఫినిషింగ్ టచ్ ఇవ్వబోతున్నాడు మంచు విష్ణు. అతడు నటించిన ‘కన్నప్ప’ సినిమా 27న వస్తోంది. ప్రభాస్ కీలక పాత్ర పోషించడంతో అతడి అభిమానులు కూడా ఈ సినిమాపై ఓ కన్నేశారు. మోహన్ బాబు, మోహన్ లాల్, అక్షయ్ కుమార్ లాంటి నటులు ఇందులో కీలక పాత్రలు పోషించారు.
