ఈ కాలం పైరసీ కామన్. సినిమా చిన్నదైనా, పెద్దదైనా పైరసీ బారిన పడాల్సిందే. థియేటర్లలోకి వచ్చిన కొన్ని గంటలకే ఆన్ లైన్ లో సినిమా ప్రత్యక్షం కావాల్సిందే. ఎవరికివారు తమకెందుకులే అనే భావనతో ఉండడం వల్ల పైరసీని అరికట్టడం సాధ్యం కావడం లేదు.
ఈ సంగతి పక్కనపెడితే.. విడుదలకు ముందే సినిమా లీక్ అవ్వడమనేది మరింత బాధాకరం. గతంలో పవన్ కల్యాణ్ విషయంలో ఇలానే జరిగింది. ఇప్పుడు సల్మాన్ ఖాన్ విషయంలో సేమ్ సీన్ రిపీట్ అయింది. అయితే ఫలితం మాత్రం రివర్స్ అయింది. అదేంటో చూద్దాం.
గతంలో ‘అత్తారింటికి దారేది’ అనే సినిమా చేశారు పవన్ కల్యాణ్. త్రివిక్రమ్ దర్శకత్వంలో చేసిన ఈ సినిమాను విడుదలకు ముందే కొంతమంది ఈ సినిమాలో కొంత భాగాన్ని ఆన్ లైన్లో లీక్ చేశారు. దీంతో అప్పట్లో పెద్ద దుమారమే చెలరేగింది. కట్ చేస్తే, లీక్ అయిన మరుసటి రోజు రిలీజైన ఆ మూవీ బ్లాక్ బస్టర్ హిట్టయింది.
ఇప్పుడు సల్మాన్ విషయంలో కూడా అదే జరిగింది. అతడు నటించిన ‘సికిందర్’ సినిమా విడుదలకు కొన్ని గంటల ముందు లీక్ అయింది. దీంతో యూనిట్ వెంటనే రంగంలోకి దిగింది. చాలా సైట్స్ ను డౌన్ చేసింది. కానీ అప్పటికే జరగాల్సిన నష్టం జరిగిపోయింది. అయితే పవన్ కల్యాణ్ కు జరిగినట్టు, సల్మాన్ కు కూడా భారీ విజయం దక్కుతుందా? రివ్యూస్ అంత ఆశాజనకంగా లేవు. కానీ మరో రెండు, మూడు రోజుల తర్వాత ఫలితం తెలుస్తుంది.
