కమెడియన్లు దర్శకులుగా మారడం కొత్తేం కాదు మనదగ్గర. ఇప్పటికే చాలామంది కమెడియన్లు దర్శకులుగా మారారు. వేణు అయితే బలగం లాంటి అద్భుతమైన సినిమా తీశాడు. ఇప్పుడు రాహుల్ రామకృష్ణ వంతు.
ఈ హాస్యనటుడు కూడా దర్శకుడిగా మారుతున్నాడు. తను దర్శకుడిగా మారబోతున్న విషయాన్ని ప్రకటిస్తూనే, నటీనటులు కావాలంటూ కాస్టింగ్ కాల్ ఇచ్చాడు. దీనిపై ఇతర నటీనటులు వ్యంగ్యంగా స్పందిస్తున్నారు. ప్రియదర్శి, రాహుల్ రవీంద్రన్ లాంటి వాళ్లు ఇతడిపై జోకులేస్తున్నారు.
ఇండస్ట్రీలో తనకంటూ ఓ గుర్తింపు తెచ్చుకున్నాడు రాహుల్ రామకృష్ణ. ‘అర్జున్ రెడ్డి’ సినిమా ఇతడికి మంచి గుర్తింపు తీసుకురాగా.. ఆ తర్వాత ‘జాతిరత్నాలు’, ‘బ్రోచేవారెవరురా’, ‘హుషారు’ లాంటి సినిమాలు ఇతడ్ని నటుడిగా నిలబెట్టాయి.
సెలక్టివ్ గా సినిమాలు చేసే ఈ నటుడు, ఇప్పుడు మెగా ఫోన్ పట్టుకోబోతున్నాడు. రియల్ లైఫ్ లో సీరియస్ గా ఉంటూ, స్పష్టమైన భావజాలం కలిగిన ఈ నటుడి నుంచి దర్శకుడిగా ఎలాంటి సినిమా వస్తుందో చూడాలి. అన్నట్టు తనకు 25-35 ఏళ్ల మధ్య వయసున్న మహిళా ఆర్టిస్టులు మాత్రమే కావాలంటూ పిలుపునిచ్చాడు రాహుల్ రామకృష్ణ.
