సీనియర్లలో ఒకేసారి 2, 3 సినిమాలు ప్రకటించే హీరోలు చాలా తక్కువ. నాగార్జున దాదాపు సినిమాలు తగ్గించేశారు. వెంకటేష్ ఒక సినిమా పూర్తయిన తర్వాత మాత్రమే మరో సినిమా టేకప్ చేస్తారు. అది కూడా గ్యాప్ ఇచ్చి. ఇక బాలకృష్ణ గ్యాప్ ఇవ్వరు కానీ, ఒకటి పూర్తయిన తర్వాతే ఇంకోటి.
కానీ చిరంజీవి అలా కాదు. ఒకేసారి 2-3 సినిమాలు ప్రకటిస్తాడు. చకచకా పూర్తిచేస్తారు. అది ఆయన స్టయిల్. ఇప్పుడు మరోసారి మెగా లైనప్ సిద్ధమైంది. బ్యాక్ టు బ్యాక్ సినిమాలు రాబోతున్నాయి.
ప్రస్తుతం ‘విశ్వంభర’ సినిమా చేస్తున్నారు చిరంజీవి. వశిష్ఠ దర్శకత్వంలో తెరకెక్కుతున్న ఈ సినిమా పూర్తయిన వెంటనే ”దసరా’ ఫేమ్ శ్రీకాంత్ ఓదెల దర్శకత్వంలో ఓ సినిమా చేయబోతున్నారు చిరంజీవి. మరో హీరో నాని, ఈ ప్రాజెక్టుకు ప్రజెంటర్ గా వ్యవహరిస్తాడు.
అలాగే ప్రస్తుతం వెంకటేష్ హీరోగా “సంక్రాంతికి వస్తున్నాం” సినిమా తీస్తున్న అనీల్ రావిపూడి దర్శకత్వంలో ఓ సినిమా చేయబోతున్నారు. ఈ సినిమాపై ఇంకా అధికారిక ప్రకటన రాలేదు. ఇలా వరుసగా సినిమాలు ఎనౌన్స్ చేస్తూ మరోసారి బిజీ అయిపోయారు చిరంజీవి.
అయితే ఈ లైనప్ లో కూతురు నిర్మాతగా చేయాల్సిన సినిమా మాత్రం ఇంకా పెండింగ్ లోనే ఉంది.
