ఎన్నో ఆశలు, అంచనాలతో మొదలైన 2024 సంవత్సరం మరో 50 రోజుల్లో ముగియనుంది. ఎప్పట్లానే ఈ ఏడాది బాక్సాఫీస్ కూడా సాదాసీదాగానే సాగింది. పట్టుమని 10 సినిమాలు మాత్రమే బ్లాక్ బస్టర్ హోదా అందుకున్నాయి. మరి ఈ మిగిలిన 50 రోజుల్లో టాలీవుడ్ బాక్సాఫీస్ మెరుస్తుందా?
రాబోయే 50 రోజుల్లో రానున్న కీలకమైన సినిమా ‘పుష్ప-2’. అందరి దృష్టి ఈ సినిమాపైనే ఉంది. ఇది బ్లాక్ బస్టర్ హిట్టయితే 2024 ఘనంగా ముగిసినట్టే. సినిమాపై ఇప్పటికే భారీ అంచనాలున్నాయి. ఆల్రెడీ వెయ్యి కోట్ల రూపాయలకు పైగా ప్రీ-రిలీజ్ బిజినెస్ చేసింది. ఈ ఇయర్ గ్రాండ్ గా ముగియాలంటే, ‘పుష్ప-2’ హిట్టవ్వాల్సిందే.
ఈ ఏడాది రాబోతున్న మరికొన్ని ముఖ్యమైన చిత్రాల్లో ‘రాబిన్ హుడ్’ కూడా ఒకటి. నితిన్-శ్రీలీల జంటగా నటించిన ఈ సినిమా సక్సెస్ టాలీవుడ్ కు ఎంత అవసరమో.. ఈ హీరోహీరోయిన్లకు కూడా అంతే అవసరం.
అటు ‘మట్కా’, ‘మెకానిక్ రాకీ’ లాంటి సినిమాలు కూడా విడుదలకు సిద్ధమయ్యాయి. ఈ 50 రోజుల్లో రిలీజ్ కాబోతున్న ఇంపార్టెంట్ మూవీస్ ఇవి మాత్రమే. ఇవన్నీ హిట్టయితే, ఈ ఏడాది టాలీవుడ్ కళకళలాడినట్టే. ఇయర్ కు ఘనంగా సెండాఫ్ ఇచ్చినట్టే.
