అల్లు అర్జున్ ప్లానింగే వేరు!

అల్లు అర్జున్ కి తన సినిమాల విషయంలో పూర్తి క్లారిటీ ఉంటుంది. సినిమాని ఎప్పుడు విడుదల చెయ్యాలి అనే విషయం నుంచి ఎలా ప్రమోట్ చెయ్యాలి అనే విషయం వరకు అన్నీ తానే చూసుకుంటాడు. సినిమాలో ఉన్న కంటెంట్ కి తగ్గట్లు ప్లాన్ చేస్తాడు. అందుకే వరుసగా భారీ విజయాలు అందుకుంటున్నాడు.

“పుష్ప 2” సినిమా ఆగస్టు 15న విడుదల కానుంది. అంటే విడుదలకు ఇంకా నాలుగు నెలల సమయం ఉంది. కానీ అప్పుడే ప్రమోషన్ మొదలు పెట్టాడు. ఈ నెలలోనే సినిమా టీజర్ వచ్చింది. ఇక ఇప్పుడు మొదటి సాంగ్ విడుదల కానుంది.

తన సినిమాల పాటలు రిలీజ్ కు నాలుగు, ఐదు నెలల ముందు నుంచే పబ్లిసిటీ చేసుకోవడం అనే పద్దతిని అల్లు అర్జున్ “అల వైకుంఠపురంలో” సినిమా నుంచి ప్రారంభించాడు. అది ఆ సినిమాకి బాగా వర్కవుట్ అయింది. “సామజవరాగమనా” “రాములో రాములా”, “బుట్ట బొమ్మ” వంటి పాటలు రిలీజ్ కు ముందే తెగ క్రేజ్ తెచ్చుకున్నాయి. దాంతో సినిమాకి భారీ ఓపెనింగ్ వచ్చింది. ఆ పాటలు ఆ సినిమా విజయంలో కీలక పాత్ర పోషించాయి.

“పుష్ప” మొదటి భాగం విషయంలో అలాగే చేశాడు. రిలీజ్ కి చాలా నెలల ముందే “హే బిడ్డా ఇది నా అడ్డా” అనే పాటని రిలీజ్ చేసి సినిమాపై హైప్ పెంచాడు. ఆ తర్వాత “శ్రీవల్లి” పాట మరింత క్రేజ్ పెంచింది. ఇక విడుదలకు ముందు “ఊ అంటావా మావ” కాక రేపింది.

అన్నట్లు అల్లు అర్జున్ నటించిన రెండు చిత్రాలకు వరుసగా తమన్ (“అల వైకుంఠపురంలో”), దేవిశ్రీ ప్రసాద్ (పుష్ప) జాతీయ అవార్డులు అందుకున్నారు. ఇక ఇప్పుడు “పుష్ప 2” సినిమా పాటలపై కూడా బన్నీ గట్టి నమ్మకంతో ఉన్నాడు. ఇప్పటి నుంచే ఈ పాటలు జనాల నోట్లో, ఫోన్లో మార్మోగేలా చూసుకుంటున్నాడు.