భారతీయుడు 2… అవన్నీ పుకార్లే!

“భారతీయుడు-2” సినిమాపై మరోసారి పుకార్లు ముసురుకున్నాయి. ఈ సినిమా చెప్పిన తేదీకి రావడం లేదనేది చాలా మంది అభిప్రాయం. ఇప్పటికే ఓసారి వాయిదా పడిన “భారతీయుడు-2” సినిమాను జులై 12న రిలీజ్ చేయబోతున్నట్టు ఇదివరకే ప్రకటించారు. ఇప్పుడు ఆ తేదీకి కూడా సినిమా రావడం లేదని, ఆగస్ట్ 15కి వాయిదా పడిందనే ప్రచారం జరుగుతోంది.

ఆగస్టు 15న విడుదల కావాల్సిన “పుష్ప 2” వాయిదా పడిన నేపథ్యంలో తమ సినిమా కథకు అనుగుణంగా ఆ డేట్ ని విడుదల చేస్తే బాగుంటుంది అని టీం అనుకుందట. అలా వార్తలు వచ్చాయి.

ఈ ప్రచారాన్ని యూనిట్ తప్పు పట్టింది. మల్టీప్లెక్సులతో ఒప్పందం కుదిరిన సందర్భంగా స్పెషల్ పోస్టర్ రిలీజ్ చేసిన నిర్మాతలు, అదే టైమ్ లో విడుదల తేదీపై మరోసారి క్లారిటీ ఇచ్చారు. కమల్ హాసన్ సేనాపతిగా నటించిన ఈ సినిమా, చెప్పిన తేదీకే వస్తుందని పరోక్షంగా పుకార్లకు స్టాప్ వేశారు.

శంకర్, కమల్ కాంబినేషన్ లో భారతీయుడు సినిమాకు సీక్వెల్ గా వస్తోంది భారతీయుడు-2. లైకా ప్రొడక్షన్స్ బ్యానర్ పై తెరకెక్కిన ఈ సినిమా ఎన్నో అడ్డంకులు, అవాంతరాలు దాటుకొని విడుదలకు సిద్ధమైంది. అనిరుధ్ కంపోజ్ చేసిన పాటలకు పెద్దగా రెస్పాన్స్ రానప్పటికీ, సినిమాపై బజ్ మాత్రం తగ్గలేదు.

సిద్దార్థ్, రకుల్, కాజల్, ఎస్ జే సూర్య కీలక పాత్రలు పోషించిన ఈ సినిమాను తమిళ్ లో ఇండియన్-2గా, తెలుగులో భారతీయుడు-2గా విడుదల చేస్తున్నారు.