ఒక్క నిమిషం కూడా ఆలోచించలేదు

‘హిట్ 3’ సినిమాలో నాని సరసన హీరోయిన్ గా నటించింది శ్రీనిధి శెట్టి. ‘కేజీఎఫ్-2’ హిట్టయిన తర్వాత తెలుగు నుంచి ఆమెకు చాలానే అవకాశాలొచ్చాయి. కానీ ఆమె మాత్రం సెలక్టివ్ గా వెళ్లింది. అందులో ‘హిట్-3’ కూడా ఒకటి.

ఈ సినిమానే ఎంచుకోవడం వెనక ప్రత్యేక కారణాన్ని బయటపెట్టింది శ్రీనిధి శెట్టి. ఈ సినిమా ఆఫర్ రాగానే ఒక్క క్షణం కూడా ఆలోచించకుండా ఓకే చెప్పిందట. దానికి కారణం హీరో నాని అంటోంది.

నాని అంటే ఇండస్ట్రీలో ఓ బ్రాండ్ అంటోంది శ్రీనిధి. అతడి సినిమాల్లో హీరోయిన్ పాత్రలకు కూడా మంచి వెయిట్ ఉంటుందని, ఆ విషయం తనకు తెలుసు కాబట్టే మరో ఆలోచన లేకుండా ‘హిట్-3’ కి ఓకే చెప్పానని అంటోంది.

మే 1న ఈ సినిమా థియేటర్లలోకి రాబోతోంది. ఈ సందర్భంగా మీడియాతో మాట్లాడుతూ ఈ ఆసక్తికర విషయాన్ని ఆమె వెల్లడించింది. సినిమా టీజర్, ట్రయిలర్ లో తను పెద్దగా కనిపించలేదని, కానీ సినిమాలో తన పాత్రకు మంచి వెయిట్ ఉందని చెబుతోంది శ్రీనిధి.