నానికి తొందర ఎక్కువ!

హీరో నాని ప్రస్తుతం “హిట్ 3” సినిమా ప్రమోషన్లు మొదలు పెడుతున్నారు. ఈ సినిమా మే 1న విడుదల కానుంది. సో ఈ నెల రోజులు నాని హడావిడి ఉంటుంది. ఆ తర్వాత “ది ప్యారడైజ్” అనే సినిమా షూటింగ్ షురూ చేస్తాడు.

ఆ సినిమా షూటింగ్ మొదలుకాకముందే మార్చి 26, 2026న విడుదల అవుతుంది అని ప్రకటించారు. తాజాగా మరోసారి పోస్టర్ విడుదల చేసి ఏడాదిలో సినిమా వస్తోంది అని కౌంట్ డౌన్ మొదలుపెట్టింది టీం. విడుదల తేదీ విషయంలో నాని కొంచెం ఎక్కువ తొందర పడుతున్నారు అని కామెంట్స్ వినిపిస్తున్నాయి.

నేచురల్ స్టార్ తన సినిమాల విడుదల, వాటి ప్లానింగ్ విషయంలో కొంచెం ఎక్కువ కేర్ తో ఉంటాడు. అందుకే, ఇంత తొందరపడుతున్నాడు. ఐతే, ఈ సారి నాని ప్లానింగ్ లో మార్పులు జరగడం ఖాయం. ఎందుకంటే వచ్చే ఏడాది మార్చి 19న కన్నడ సూపర్ స్టార్ యష్ నటిస్తున్న “టాక్సిక్” రానుంది. మార్చి 26న రామ్ చరణ్ మూవీ “పెద్ది” విడుదల కానుంది. కానీ, “పెద్ది” టీమ్ ఇంకా అధికారికంగా డేట్ ప్రకటించలేదు. కానీ ఆ డేట్ ఫిక్స్ అని టీం చెప్తోంది.

రామ్ చరణ్ సినిమా, యష్ సినిమా ఆ డేట్స్ కి వస్తే నాని ఇంకో డేట్ ఏప్రిల్ 2026లో చూసుకోవాలి.