నష్టాన్ని భర్తీ చేయనున్న బన్నీ

అల్లు అర్జున్ అత్యధిక పారితోషికం అందుకునే హీరోల్లో ఒకరు. సినిమాకు 150 కోట్లవరకు తీసుకుంటారట. ఐతే, మూడేళ్లకు ఒక్క సినిమా మాత్రమే చేస్తున్నారు. ఆ లెక్కన చూస్తే అతనికి సినిమాల ద్వారా ఏడాదికి 50 కోట్లు మాత్రమే వస్తాయి. ఎందుకంటే ‘పుష్ప-2’ కోసం మూడేళ్లు టైమ్ తీసుకున్నాడు ఈ హీరో.

ప్రభాస్ వంటి హీరోలు ప్రతి ఏడాది ఒక సినిమా వచ్చేలా చూసుకుంటున్నారు. ప్రభాస్ సంపాదన ఎక్కువ. బన్నీ చాలా లాస్ అవుతున్నాడు. అందుకే ఇకపై రెండేళ్లకు 3 సినిమాలు వచ్చేలా ప్లాన్ చేస్తానని అంటున్నాడు.

రెండు, మూడేళ్లకు ఒక్క సినిమా చెయ్యడం వల్ల కోల్పోయిన సంపాదనని, నష్టపోయిన ఆ మొత్తాన్నిఇకపై వేగంగా సినిమాలు చేసి భర్తీ చేస్తాడట.

మరోవైపు, తాను అందుకున్న మొదటి అడ్వాన్స్ గురించి కూడా చెప్పాడు. ఒకరోజు రాఘవేంద్రరావు అల్లు అర్జున్ చేతిలో వంద రూపాయలు పెట్టారంట. “ఇదే అడ్వాన్స్, నువ్వు నాకు ఓ సినిమా చేయాలి” అన్నారట. అలా రాఘవేంద్రరావు చేతులు మీదుగా తొలిసారి వంద రూపాయలు అడ్వాన్స్ అందుకున్నానని, ఆ తర్వాత ఆయన దర్శకత్వంలోనే హీరోగా పరిచయమయ్యానని గుర్తుచేసుకున్నాడు బన్నీ.

తనకు హీరోగా జన్మనిచ్చిన రాఘవేంద్రరావును ఎన్నటికీ మరిచిపోనని, తన ఆఫీస్ లో అడుగుపెట్టడానే డోర్ దగ్గర ఆయన ఫొటోనే ఉంటుందని అన్నాడు.