టైమ్ కంటే ముందే ఓటీటీలోకి!

సూపర్ హిట్టయిన సినిమాలే 3-4 వారాల్లో ఓటీటీలోకి వచ్చేస్తున్న రోజులివి. అలాంటిది డిజాస్టర్ సినిమా ఎందుకు ఆగుతుంది. అనుకున్న టైమ్ కంటే ముందే ఓటీటీలో ప్రత్యక్షమౌతుంది. ‘థగ్ లైఫ్’ సినిమా మేటర్ ఇది.

కమల్-శింబు నటించిన ఈ సినిమా థియేటర్లలో అట్టర్ ఫ్లాప్ అయింది. అట్టర్ ఫ్లాప్ అనే కంటే, ఆల్ టైమ్ డిజాస్టర్స్ లో ఒకటిగా నిలిచిందని చెప్పడం కరెక్ట్. తెలుగు, తమిళ్, మలయాళం అనే తేడా లేకుండా రిలీజైన అన్ని భాషల్లో, అన్ని ప్రాంతాల్లో ఈ సినిమా డిజాస్టర్ అనిపించుకుంది.

తెలుగులో నితిన్ తండ్రి సుధాకర్ రెడ్డి రిలీజ్ చేసిన ఈ సినిమా అతడికి భారీ నష్టాలు తెచ్చిపెట్టింది. అందుకే ఇప్పుడీ సినిమా అనుకున్న టైమ్ కంటే ముందే ఓటీటీలో ప్రత్యక్షం కానుంది.

నెట్ ఫ్లిక్స్ ఈ సినిమా రైట్స్ ను కొనుగోలు చేసింది. 7 వారాల లాక్ ఇన్ పీరియడ్ కింద రైట్స్ అమ్మిన నిర్మాతలు, ఇప్పుడు 3 వారాలకే సినిమాను ఓటీటీకి ఇచ్చేందుకు ముందుకొచ్చారు. దీని వల్ల నాన్-థియేట్రికల్ ఆదాయం ఇంకాస్త పెరుగుతుంది.