15 నిమిషాలు కట్

సినిమాపై నమ్మకంతో భారీ రన్ టైమ్ తో రిలీజ్ చేస్తుంటారు. సక్సెస్ అయితే ఓకే, ఫెయిల్ అయితే మాత్రం ఉన్నఫలంగా కోత పెడతారు. సినిమా నిడివి తగ్గించామని, ఇప్పుడు థియేటర్లకు రావాలని కోరుతుంటారు మేకర్స్. దీని వల్ల ఎలాంటి ప్రయోజనం ఉండదని తెలిసినప్పటికీ, చివరాఖరి ప్రయత్నంగా కత్తెరకు పనిచెబుతుంటారు.

అయితే హిట్ అయిన సినిమాకు నిడివి తగ్గించిన దాఖలాలు మాత్రం చాలా అరుదు. ఇది అలాంటిదే. కార్తి, అరవింద్ స్వామి హీరోలుగా నటించిన సినిమా “సత్యం సుందరం'”. 96 ఫేమ్ ప్రేమ్ కుమార్ తెరకెక్కించిన ఈ సినిమా తాజాగా థియేటర్లలోకి వచ్చింది. ప్రేక్షకుల హృదయాలకు హత్తుకుంది.

ఈ మధ్య కాలంలో ఇంత మంచి సినిమా రాలేదంటున్నారు చూసిన ప్రేక్షకులు. అలా హిట్ టాక్ తెచ్చుకున్నప్పటికీ సినిమా నుంచి 15 నిమిషాలు కట్ చేశారు. ఈ సినిమా 2 గంటల 57 నిమిషాల నిడివితో తెరకెక్కింది. సినిమా బాగున్నప్పటికీ, మరింత మంచి అనుభూతిని ఇచ్చేందుకు సెకండాఫ్ నుంచి పావు గంట సినిమాను కట్ చేశారు.

తెలుగు ప్రేక్షకుల్ని కూడా ఇది ఆకట్టుకుంది. అయితే దేవర హవా ముందు సత్యం సుందరం చిన్నబోయింది. మౌత్ టాక్ బాగున్నప్పటికీ మంచి థియేటర్లు దొరక్క వసూళ్లలో ఇది వెనకబడింది.