హీరోకే కాదు…ఆమెకీ పరీక్ష

‘మట్కా’ సినిమా చాలామంది కెరీర్స్ డిసైడ్ చేసే సినిమాగా మారింది. అందులో హీరోగా నటిస్తున్న వరుణ్ తేజ్ కు, ఆ సినిమాను డైరక్ట్ చేస్తున్న కరుణ కుమార్ కు ఇలా చాలామందికి ఆ సినిమా సక్సెస్ అవసరం. ఇప్పుడా జాబితాలోకి సలోని కూడా చేరింది.

అవును.. ‘మట్కా’ సినిమాలో సలోని కూడా ఉంది. ఈ సినిమాలో ఓ కీలక పాత్రలో ఆమె నటిస్తోంది.
మూవీలో సలోని క్యారెక్టర్ ని పద్మగా పరిచయం చేస్తూ ఫస్ట్ లుక్ రిలీజ్ చేశారు. చీరకట్టులో హుందాగా కనిపించింది. ఫస్ట్ లుక్ చూస్తుంటే, ఆమెది సీరియస్ పాత్ర అనే విషయం తెలుస్తోంది.

ఈ సినిమాపై సలోనీ చాలా ఆశలు పెట్టుకుంది. ఎందుకంటే, రీసెంట్ గా ఆమెకు సరైన హిట్ తగల్లేదు. నిజానికి ఆమె హీరోయిన్ గా క్లిక్ అవ్వాలని అనుకోవట్లేదు. కనీసం క్యారెక్టర్ ఆర్టిస్టుగా సెటిల్ అయినా చాలని భావిస్తోంది.

ఈ మేరకు ఆమె చాన్నాళ్ల కిందటే సెకెండ్ హీరోయిన్ పాత్రలకు, క్యారెక్టర్ రోల్స్ కు షిఫ్ట్ అయింది. అయితే సరైన బ్యానర్లు, మంచి కథలు ఎంచుకోవడంలో విఫలమైంది. దీంతో కొన్ని సినిమాలు ఫ్లాప్ అవ్వగా, మరికొన్ని సినిమాలు విడుదలకు కూడా నోచుకోలేదు. ఇలాంటి క్లిష్ట పరిస్థితుల్లో ‘మట్కా’ రూపంలో ఆమెకు కాస్త బజ్ ఉన్న సినిమా దక్కింది. అందుకే ఆశలన్నీ దీనిపైనే పెట్టుకుంది.