ప్రేమకు అదే మూలం

మాజీ ప్రియుడు అర్జున్ కపూర్ నుంచి విడిపోయినప్పట్నుంచి మౌనంగా ఉంది మలైకా అరోరా. అయితే సోషల్ మీడియాలో మాత్రం ఆమె తన బ్రేకప్ పై పరోక్షంగా స్పందిస్తూనే ఉంది. ఎప్పటికప్పుడు అర్థవంతమైన కొటేషన్స్ పెడుతూ, తన ఆలోచనలు పంచుకుంటూనే ఉంది.

తాజాగా ప్రేమపై మలైకా తన అభిప్రాయాన్ని వ్యక్తం చేసింది. “ప్రయత్నమే ప్రేమకు ప్రాణవాయువు. అది లేకపోతే వేడి చల్లారిపోతుంది.” అనే పోస్ట్ పెట్టింది. ప్రేమను వ్యక్తం చేయడానికి, భాగస్వామికి దగ్గరవ్వడానికి చొరవ తీసుకోవడం చాలా ముఖ్యమని మలైకా అభిప్రాయం.

దీనిపై ఇప్పుడు హాట్ హాట్ డిస్కషన్ జరుగుతోంది. మలైకా ఆశించిన చొరవను అర్జున్ కపూర్ చూపించలేదని, అందుకే వీళ్లు బ్రేకప్ అయి ఉంటారని అంతా చర్చించుకుంటున్నారు. దీనికంటే ముందు ఆమె మరో పోస్ట్ పెట్టింది. “మీ సమయాన్ని, ఉనికిని నిజంగా మీకు విలువనిచ్చే వాళ్లపైనే పెట్టండి” అంటూ పోస్ట్ పెట్టింది. ఇది కూడా అర్జున్ కపూర్ ను ఉద్దేశించి పెట్టిందేనంటున్నారు చాలామంది.

ఇలా బయటకు నేరుగా మాట్లాడకుండా, తన కొటేషన్స్ తో చాలా విషయాలు బయటకు చెప్పేస్తోంది మలైకా.