‘సంక్రాంతి’ కోసం సెట్ చేస్తాడా?

సీనియర్ నాగార్జునకు ఇటీవల కాలంలో సంక్రాంతి సెంటిమెంట్ పట్టుకొంది. ఇంకా నిజం చెప్పాలంటే… సంక్రాంతి సమయంలో తప్ప మిగతా సమయాల్లో తన సినిమాలకు కలెక్షన్లు రావేమో అనే భయం పట్టుకున్నట్లు కనిపిస్తోంది. ఎందుకంటే రీసెంట్ గా నాగార్జున నటించిన సినిమాల్లో ఆడిన చిత్రాలు అన్నీ సంక్రాంతి సమయంలో విడుదలైనవే. మిగతా కాలంలో విడుదలైనవి దారుణంగా పరాజయం పాలు అయ్యాయి.

అందుకే, ఇటీవల ఆగస్టు, సెప్టెంబర్ లో సినిమా మొదలు పెట్టి నాలుగు నెలల్లో పూర్తి చేసి సంక్రాంతికి విడుదల చేస్తున్నారు నాగార్జున. గతేడాది “నా సామి రంగ” చిత్రం అలాగే ప్లాన్ చేసి వదిలారు. అది ఆడింది.

మరి ఈ ఏడాది కూడా అలాగే మరో సినిమా సెట్ చేస్తారా అనేది చూడాలి. నాగార్జున ప్రస్తుతం శేఖర్ కమ్ముల దర్శకత్వంలో “కుబేర” చిత్రంలో నటిస్తున్నారు. ఇందులో ధనుష్ హీరో. నాగార్జున ది కీలక పాత్ర. “కుబేర” వచ్చే ఏడాది వేసవిలో విడుదల అవుతుంది.

సంక్రాంతికి తానే హీరోగా కనిపించే ఒక సినిమాని సెట్ చేసేందుకు నాగార్జున కసరత్తు చేస్తున్నట్లు టాక్. “బంగార్రాజు 2” కానీ మరోటి కానీ మొదలుపెట్టి సంక్రాంతి 2025కి విడుదల చెయ్యాలనుకుంటున్నారాట. మరి అది సెట్ అవుతుందా?