త్రివిక్రమ్ వెయిట్ చెయ్యాల్సిందే

అల్లు అర్జున్ – త్రివిక్రమ్ కాంబినేషన్ లో వచ్చేనెల (ఏప్రిల్ 2025) మొదలు కావాల్సిన సినిమా మరింత ఆలస్యం కానుంది. అల్లు అర్జున్ ముందుగా అట్లీతో సినిమా చేస్తున్నాడు. ఆ సినిమా షూటింగ్ సగభాగం పూర్తయ్యాక త్రివిక్రమ్ తో సినిమా స్టార్ట్ చేస్తాడట.

అంటే 2026లోనే అల్లు అర్జున్ – త్రివిక్రమ్ సినిమా స్టార్ట్ అవుతుంది. త్రివిక్రమ్ తీసిన ‘గుంటూరు కారం’ జనవరి 2024లో విడుదలైంది. అల్లు అర్జున్ మూవీ జనవరి 2026లో మొదలైతే, త్రివిక్రమ్ రెండేళ్లు ఖాళీగా ఉన్నట్లు అవుతుంది. ఐతే, “పుష్ప 2” తర్వాత అల్లు అర్జున్ కి పెరిగిన భారీ మార్కెట్, హిందీలో వచ్చిన క్రేజ్ ని చూసి త్రివిక్రమ్ ఇప్పుడు తన షూటింగ్ ని మరో 8 నెలలు పోస్టుపోన్ చేసేందుకు అంగీకరించాడు అని సమాచారం.

త్రివిక్రమ్ దర్శకుడిగా ఎన్నో హిట్స్ ఇచ్చారు. అల్లు అర్జున్ తో తీసిన మూడు చిత్రాలు – జులాయి, సన్నాఫ్ సత్యమూర్తి, అల వైకుంఠపురంలో – భారీ విజయం సాధించాయి. కానీ త్రివిక్రమ్ కి ఇప్పటివరకు జాతీయ స్థాయిలో హిట్టైన సినిమా లేదు. తన  పాన్ ఇండియా కలలకు అల్లు అర్జున్ కి ఇప్పుడు ఉన్న మార్కెట్ కరెక్ట్ అని త్రివిక్రమ్ ఆలోచన. అందుకే నిరీక్షించేందుకు అంగీకరించినట్లు సమాచారం.

వీరి కాంబినేషన్ లో రూపొందే కొత్త సినిమా కార్తికేయ కథ (స్కంద పురాణం) ఆధారంగా రూపొందనుంది.