2 మిలియన్ క్లబ్ లో పుష్ప-2

‘పుష్ప-2’ రిలీజ్ కు ఇంకా టైమ్ ఉంది. కానీ అంతలోనే ఈ సినిమా 2 మిలియన్ డాలర్ క్లబ్ లోకి చేరిపోయింది. అవును.. యూఎస్ఏలో బన్నీ సినిమా ప్రభంజనం మొదలైంది. ప్రీ-సేల్స్ లో ఈ సినిమా 2 మిలియన్ డాలర్ క్లబ్ లోకి చేరిపోయింది.

మరో 2 రోజుల్లో ఈ సినిమా అమెరికాలో రిలీజ్ అవుతోంది. విడుదల్లోపు ఈ మూవీ అడ్వాన్స్ బుకింగ్స్ రూపంలో 3 మిలియన్ డాలర్ క్లబ్ లో చేరుతుందని అంచనా వేస్తున్నారు.

నిజానికి ఈ సినిమా ఈ పాటికే 3 మిలియన్ డాలర్ క్లబ్ లోకి చేరాలి. కానీ అమెరికాలో క్రిస్మస్ బరిలో పోటీ తీవ్రంగా ఉంది. డిసెంబర్ మొదటి వారం నుంచి చివరి వారం వరకు చాలా హాలీవుడ్ సినిమాలు అక్కడ రిలీజ్ అవుతున్నాయి. దీంతో ‘పుష్ప-2’కు స్క్రీన్ కౌంట్ తగ్గిందంటున్నారు.

ఇటు తెలుగు రాష్ట్రాల్లో ‘పుష్ప-2’ విడుదలకు రంగం సిద్ధమైంది. విడుదలకు ముందు వేసే బెనిఫిట్ షో నుంచి, ఏకథాటిగా 19 రోజుల పాటు ఈ సినిమాకు నైజాంలో టికెట్ రేట్లు పెంచారు. మల్టీప్లెక్సుల్లో మొదటి వారాంతం (4 రోజులు) టికెట్ పై 200 రూపాయలు.. ఆ తర్వాత 8 రోజులు 150 రూపాయలు, అక్కడ్నుంచి మరో వారం రోజులు టికెట్ పై 50 రూపాయలు పెంచారు.

అలా 19 రోజుల పాటు ‘పుష్ప-2’ సినిమాకు టికెట్ రేట్లు పెంచుకునే వెసులుబాటు కల్పించింది ప్రభుత్వం. ఇక బెనిఫిట్ షోలకైతే ఏకంగా టికెట్ పై 800 రూపాయల పెంపుకు అనుమతినిచ్చింది. ప్రపంచవ్యాప్తంగా 12500 స్క్రీన్స్ లో ఈ సినిమా రిలీజ్ అవుతుంది.