చందు మొండేటి డ్రీమ్!

తన ఫేవరెట్ హీరోతో సినిమా చేయాలని ప్రతి దర్శకుడికి ఉంటుంది. దర్శకుడిగా ఎదిగే క్రమంలో ఆ డ్రీమ్స్ ను నెరవేర్చుకుంటుంటారు. ఈ విషయంలో అనీల్ రావిపూడి, బాబి, హరీశ్ శంకర్ లాంటి దర్శకులు ముందున్నారు. ఎందుకో చందు మొండేటి మాత్రం వెనకబడిపోయాడు.

అనీల్ రావిపూడికి ఇష్టమైన హీరో వెంకటేశ్. వెంకీతో సినిమా చేయాలనేది అతడి డ్రీమ్. ఆ కలను అతడు ఒకటికి మూడు సార్లు నెరవేర్చుకున్నాడు. ఈ క్రమంలో వెంకీకి కెరీర్ బిగ్గెస్ట్ హిట్ కూడా ఇచ్చాడు. ఇక బాబి, హరీశ్ శంకర్ కూడా తమ కలల్ని సాకారం చేసుకున్నారు. ఫేవరెట్ హీరోలతో సినిమాలు చేశారు.

మరి చందు మొండేటి సంగతేంటి? తన ఫేవరెట్ హీరో అంటే అప్పటికీ, ఇప్పటికీ, ఎప్పటికీ నాగార్జున అంటుంటాడు ఈ దర్శకుడు. కానీ ఇప్పటివరకు నాగ్ తో సినిమా చేయలేకపోయాడు. భవిష్యత్తులోనైనా చేస్తాడా? కచ్చితంగా చేస్తానంటున్నాడు.

“గతంలో నాగార్జునతో సినిమా చేయాలనుకున్నాను. కథ కూడా చాన్నాళ్ల కిందటే రెడీ చేసుకున్నాను. అదొక పోలీస్ కథ. అప్పట్లో అది అడ్వాన్స్ డ్ స్టోరీ-స్క్రీన్ ప్లే ఉన్న కథ. హీరో క్యారెక్టర్ పాజిటివా, నెగెటివా అనే సందేహం కలిగించేలాంటి స్క్రీన్ ప్లే అది. ఎప్పుడైతే ‘విక్రమ్’ సినిమా వచ్చిందో, ఆ కథను ఇక సినిమాగా తీయలేనని అర్థమైపోయింది. ప్రస్తుతానికైతే నాగార్జుతో సినిమా చేయాలని బలంగా ఉంది.”

ఏడాదిన్నర నుంచి నాగార్జున సినిమా కథ కోసం ఆలోచనలో ఉన్నానని.. తన మైండ్ లో చిన్న స్పార్క్ వచ్చినా లేదా ఎవరైనా ఓ మంచి స్టోరీలైన్ ఇచ్చినా నాగ్ తో సినిమా చేయడానికి రెడీ అని ప్రకటించాడు ఈ దర్శకుడు. నాగార్జునతో ఎప్పుడు సినిమా చేసినా ‘కూలీ’, ‘విక్రమ్’ రేంజ్ లో స్టయిలిష్ యాక్షన్ మూవీ చేయాలనేది తన ఆలోచనగా చెప్పుకొచ్చాడు.