ఆమె డ్యాన్స్ రొటీన్ అయిందా?

సాయి పల్లవి గొప్ప డ్యాన్సర్. ఆమెలా డ్యాన్స్ చేసే హీరోయిన్లు చాలా తక్కువ. శ్రీలీల వచ్చిందిప్పుడు. కానీ సాయి పల్లవి స్టెప్స్ వేరు. గ్లామర్ షో లేకుండా చేసే ఆమె డ్యాన్స్ కి విపరీతమైన ఫ్యాన్స్ ఉన్నారు.

ఐతే, ఇటీవల ఆమె ప్రతి సినిమాల్లో అవసరం ఉన్నా లేకున్నా… డ్యాన్స్ లు చెయ్యడం, అలాంటి పాటలు పెట్టడం వల్ల జనాలు మొనాటనీ ఫీల్ అవుతున్నారు. దాని వల్ల, ఆ సినిమాలకే ఎక్కువ నష్టం. ఇప్పటికే “తండేల్” విషయంలో ఆ ప్రమాదం జరిగింది.

“తండేల్” సినిమాలో నాగ చైతన్య, సాయి పల్లవి జంటగా నటించారు. ఇంతకుముందు వీరిద్దరూ శేఖర్ కమ్ముల తీసిన “లవ్ స్టోరీ”లో కూడా జంటగా కనిపించారు. ఆ సినిమాలో డ్యాన్స్ కి కథలోనే స్కోప్ ఉంది. కానీ “తండేల్”లో అలాంటిది ఏమి లేదు. బలవంతంగా రెండు పాటల్లో ఆమె డ్యాన్స్ పైనే ఫోకస్ పెట్టింది టీం.

కానీ ఈ సినిమా అమెరికా ప్రేక్షకులని మెప్పించలేకపోయింది. ఆమె డ్యాన్స్ కోసం కూడా వాళ్ళు రాలేదు. తెలుగునాట కూడా యావరేజ్ గానే ఆడింది. సాయి పల్లవి డ్యాన్స్ కానీ, ఆమె నటన కానీ జనాలను పెద్దగా ఊపెయ్యలేదు. ఇంతకుముందు వచ్చిన “అమరన్” సినిమాలో సాయి పల్లవి ఇవేవీ చెయ్యలేదు. కానీ అద్భుతమైన నటన ప్రదర్శించింది. ఆ సినిమా బాగా ఆడింది.

కథ ప్రకారమే వెళ్ళాలి తప్ప ఆమె డ్యాన్స్ ని ఇరికిస్తే జనం చూడరు.