నా భార్య త్యాగం చేసింది: అజిత్

దక్షిణాది హీరోల్లో అజిత్ కుమార్ పద్దతి, శైలి ప్రత్యేకం. వివాదాలకు దూరంగా ఉంటాడు. సింపుల్ గా బతుకుతాడు. సినిమాల కన్నా కార్ రేసింగ్ లు, బైక్ రేసింగ్ లు అతనికి చాలా ఇష్టం. వాటి మీదే ప్రాణం పెడుతాడు. తన సినిమాలకు సంబంధించి ఒక్క ప్రెస్ మీట్ కూడా నిర్వహించడు. ప్రమోషన్ లకు పూర్తిగా దూరం. అయినా భారీ ఓపెనింగ్స్ వస్తాయి. అదీ స్టార్డం.

అజిత్ కి ఇటీవల పద్మభూషణ్ తో ప్రభుత్వం సత్కరించింది. ఈ అవార్డు తీసుకున్న తర్వాత అజిత్ ఇండియాటుడే ఛానెల్ కి ప్రత్యేకంగా ఇంటర్వ్యూ ఇచ్చాడు. ఆ ఇంటర్వ్యూలో తన భార్య షాలినిని పొగిడాడు.

“షాలిని పెద్ద హీరోయిన్. ఆమెకి చాలామంది అభిమానులు ఉన్నారు. కానీ నా కోసం తన, మా కుటుంబం కోసం కెరీర్ ని పక్కన పెట్టింది. ఎన్నో త్యాగాలు చేసింది. కష్టాల్లో అండగా ఉంది. జీవితాన్ని మా కుటుంబానికి అంకితం చేసింది. నేను సరైన నిర్ణయాలు తీసుకోనప్పుడూ, నేను తప్పులు చేసినప్పుడూ అండగా నిలిచింది. సో నా విజయం మొత్తం ఆమెకే చెందుతుంది,” అని పొగిడాడు అజిత్.

షాలిని “సఖి” సహా అనేక హిట్ చిత్రాల్లో హీరోయిన్ గా నటించింది. అజిత్ తో కూడా నటించింది. ఐతే, వీరు ఒక సినిమాలో నటిస్తున్నప్పుడు ప్రేమలో పడి, ఆ వెంటనే పెళ్లి చేసుకున్నారు. వీరికి ఇద్దరు పిల్లలు.